Numax

Dende hai pouco máis dun ano en hábitat social estamos involucrados no proxecto de Númax co deseño e construción do seu espazo, que aportará á cidade de Santiago de Compostela unha nova oferta cultural.

“Un cinema, unha librería e un laboratorio de deseño, comunicación e produción audiovisual. Somos unha cooperativa de traballo asociado sen ánimo de lucro formada por persoas  procedentes de diversos ámbitos da creación e difusión cultural que decidimos colaborar para facermos xuntos o que estamos afeitos a facer por separado.”

actuaL_fachada

Númax presenta unha completa actividade cultural composta sobre tres eixos complementarios. Por unha banda, dende a rúa convidase a entrar na librería especializada en humanidades, onde se poderá consultar libros relaxandose entre os recunchos que forman as amplas xanelas. Un espazo tranquilo, luminoso e agradable rodeado dos máis de tres mil libros dos que disporá. Entre a variedade tamen se crearán percorridos bibliográficos que acompañen ás proxeccións da sala de cinema.

Numax proxectará filmes en versión orixinal subtitulada, poderanse ver obras que aposten pola innovación formal e temática, como sesións clásicas ou infantis. Proxectará entre seis e oito filmes ao mes, unha sala para 71 espectadores con soporte de alta definición.

O terceiro eido ubicase na oficina do local, será un estudo de deseño gráfico e produción audiovisual. A proposta programática conta tamen con sesións de formación, obradoiros, e encontros con realizadores, escritores, etc.

O programa de necesidades proposto por Numax viña dado por unha sala de cine cun aforo mínimo de 70 persoas, con cabina de proxección independente, un espazo destinado a librería cunha capacidade de exposición ó público de 3200 volumes e mais un ámbito para oficina interna cunha parte independente de laboratorio para edición de vídeo, ademais dos aseos necesarios por normativa. Existía a pretensión de que o acceso non fose independente para os usos de librería e cine, senón que houbese unha relación, controlable, entre eles.

Numax_maqueta

CINE

Aproveitouse o ámbito de maiores dimensións sen obstáculos (piares) e con menor contacto coa fachada para a situación da sala de proxección. A sala ten unhas necesidades acústicas importantes, resoltas cunha dobre envolvente (sistema box in box), consistente nun forrado con función de illamento e un trasdosado interior para absorver e acondicionar. A pequena sala resultante configurase cun espazo de visionado envolto en viruta de madeira negra, e unha zona de comunicación de menor altura. Por comodidade, o acceso á cabina de proxección resolveuse con entrada independente, para evitar pasar pola zona de butacas.

A programación pretende centrarse fundamentalmente no cine de autor, dando resposta a unha carencia dentro da oferta habitual da cidade de Santiago. Así, posúe unha finalidade marcadamente cultural, co obxectivo de promover a difusión e o debate en torno a un cine de calidade, que non atopa cabida no circuíto comercial establecido.

LIBRERIA

Deixouse a mellor relación co exterior para a librería, a cal se desprega en L ó longo da fachada, conseguindo un espazo luminoso e xerando ámbitos de estancia agradables en torno ás fiestras, á vez que permitindo a instalación de escaparates. Ademais do mobiliario fixo situado no perímetro (estantes e moble baixo de almacenaxe) recórrese a mobiliario móbil que permitirá un uso flexible do espazo ó adoptar distintas disposicións e funcións.

O acceso ó local prodúcese a través da porta con menor desnivel respecto á rúa para facilitar a solución de accesibilidade. O vestíbulo, sen separación física respecto do espazo da librería, posúe unhas dimensións xenerosas para resolver comodamente a entrada e saída dos espectadores do cine. Nel sitúase a zona de atención ó público, un mostrador con diferentes configuracións, que fará as veces de despacho de billetes e de punto de venda para a librería.

Os aseos ocupan unha posición central na planta baixa, para servir ás dúas actividades principais. Finalmente, polo seu carácter máis privado, optouse por combinar nun mesmo espazo do semisoto a oficina e o espazo de almacenaxe xeral, resolvendo a conexión entre niveis cunha escaleira de caracol que comunica coa zona de librería.

Numax_inicio

As obras, xestionadas dende habitat social, inician a súa recta final. Primeiramente, logo da preparación do chan (picado recrecido, apertura oco escaleira e selado do anterior), levantouse a tabiquería que divide o ámbito do cinema e da libreria, e forma o espazo central dos aseos e mostrador. Esta separación de espazos permite que diferentes traballos se realicen simultáneamente sen entorpecerse na obra.

-Video realizado por Númax-

Gran parte do executado ata agora foron elementos indispensables para o funcionamento da sala que permanecerán ocultos, como instalacións e sobre todo moitas capas de materiais que illarán acústicamente a sala de cinema.

O local abrirá ao público neste próximo mes de marzo. Por diante queda moito traballo de carpintería, acabados e montaxe de mobiliario.

Numax_pladur_1

Numax_pladur_2

Numax_cine_grada

Información sobre Numax en numax.org

OBRADOIROS_Cans

Obradoiro Ducia de Cans

O espazo de intervención cultural Normal, da Universidade da Coruña, acaba de lanzar a convocatoria para participar no obradoiro Ducia de Cans, que conduciremos dende Hábitat Social xunto co estudio Creus e Carrasco.

http://istoenormal.org/gl/actividades/obradoiro-ducia-de-cans

O curso propón a reflexión sobre a reconversión do cotián que suxire o Festival de Cans, incidindo na perspectiva territorial, na transformación do espazo habitado, e na interpretación das súas formas construídas. O curso desenvolverase en dúas fases, unha inicial, máis teórica, de análise e deseño colectivos, e outra a continuación, máis práctica, a modo de obradoiro de montaxe da solución proposta, a cal servirá de soporte físico da exposición Ducia de Cans, que ocupará a Normal entre os meses de novembro de 2014 e xaneiro de 2015.

Indicar que a participación no curso está aberta a toda a xente e non só a estudantes da UDC, así como que o prazo de inscrición é especialmente breve xa que a primeira fase comeza xa o luns dia 13 de outubro.

Animádevos a participar nesta experiencia de reflexión, deseño e construción colectivas!

+info no pdf

OBRADOIROS_Cans_b

pallabarro_01

Procesos abertos: autoconstrución en Carballo

Partidarios como somos en Hábitat Social de entender os nosos proxectos non como resultados senón como procesos abertos, o certo é que, polas esixencias do día a día, os vimos comunicando como experiencias rematadas, unha vez chegan ó seu fin. Por iso, intentando rachar con esta dinámica, queremos achegarvos un interesante proxecto que temos en marcha na cooperativa dende hai máis dun ano, e que, aínda que modesto, aborda unha serie de cuestións que pensamos resumen bastante ben algunhas inquedanzas e xeitos de traballar que van collendo forma e forza no estudio.

Trátase da reforma da vella casa familiar, situada nunha aldea de Carballo, de Roberto e Elena, unha parella moza que deixa atrás a cidade da Coruña para facer vida no campo. O inmoble, froito de distintos crecementos no tempo (non todos igual de afortunados), presenta problemas de orientación, de relación coa parcela e de distribución interior. Construtivamente consta de muros de carga (de mampostería no corpo máis vello e de formigón ciclópeo no novo), forxados unidireccionais de formigón armado, e cubertas plana e a dúas augas de fibrocemento. Seguir lendo

IMG_0056_

O Albergue de Selmo

Vimos de rematar un proxecto de reforma para un albergue de peregrinos no Camiño Francés de Santiago. A falta de retoques e pequenos cambios que irán xurdindo co uso, xa podemos amosar algunhas imaxes dos primeiros días de funcionamento. Seguir lendo

UD_01_

Unidade didáctica “Dereito ao hábitat”

Despois duns meses sen achegar novas a este espazo (en boa medida como consecuencia dunha crecente actividade na cooperativa, o que nos esixiu concentrar a dedicación nos proxectos en marcha), queremos retomar a comunicación e presentarvos algúns dos froitos deste período.

Así, vimos de facer entrega da unidade didáctica ‘Dereito ao hábitat’ a Arquitectos sen Fronteiras, quen nos encargara a preparación deste material escolar dentro da súa liña estratéxica de Educación para o desenvolvemento. O propósito da unidade é o de funcionar como complemento á temática referente aos Dereitos Humanos dentro da materia de Educación para a cidadanía e outras afíns do curso de 4º da ESO. Seguir lendo

DSC_0784

#fuxirdocentro en Arquitecturas Colectivas

Hábitat Social xa está por Valadares botando unha man cos últimos retoques para o encontro de Arquitecturas Colectivas que comeza mañá.

A estas alturas case podemos confirmar a estrutura da mesa de debate #fuxirdocentro. O xoves trataremos de contextualizar e caracterizar este “fenómeno” de proxectos vitais que buscan fóra da cidade a súa oportunidade, intentando adiviñar as súas lóxicas, potencialidade, límites, etc. Para abrir o debate contaremos coa presentación sobre decrecimento de Manoel Santos, e a de Proxecto Caracol. Á mesa engadirase tamén o permacultor César Lema. Seguir lendo

galiña_02-900x460

#fuxirdocentro

Reflexións en torno a outro modelo (autónomo) de habitar

“Se a forma capitalista de urbanización está tan plenamente inserta na reprodución do capitalismo e resulta fundamental para esta, iso significaría tamén que para calquera intento de poñer en pé unha alternativa anticapitalista sería decisivo atopar formas alternativas de urbanización”.  David Harvey

De entre as múltiples vertentes que engloba o concepto do “buen vivir”, fío argumental do encontro de AACC Galiza, a definición do espazo no que habitamos constitúe unha das máis relevantes pola súa transcendencia e polo xeito en que inflúe e determina moitas das outras. Seguir lendo

El Buen Vivir

En sincronía cos tempos actuais o concepto de vida evapórase do nosa comprensión como un valor de cambio, mostrándose tan difícil de comprender como complexo de calcular.
O modo de vida das sociedades occidentais converteuse nunha máquina de produción acompañada de efectos devastadores que impregnan as formas nas que pensamos, construímos e habitamos o territorio. No que ten que ver coas construcións físicas e as relacións sociais estamos non poucas veces obrigados a seguir ritmos que somos incapaces de controlar. Seguir lendo

O estaleiro de Purro

Hai uns meses, o Concello de Bueu, motivado pola loita e a presión veciñal(1), paralizou a demolición dun dos poucos estaleiros de ribeira que se conservan no País(2).
Dende Hábitat Social estábamos motivados en participar nun concurso que partía dos desexos da cidadanía porque nos parecía un caldo de cultivo fabuloso para unha solución que a puidese involucrar de maneira proactiva. A nosa sorpresa chega cando nos atopamos cunhas bases elaboradas pola Xunta a través da Dirección Xeral do Patrimonio Cultural, que restrinxían a participación con requisitos de obra construída que practicamente ningún profesional que comezara a traballar antes do estoupido inmobiliario podería cumprir (pto. 10).
Entendemos que a proposta máis interesante xurdida dun concurso, non ten que ver co volume de obra construída previamente, para eso hai unha xente chamada xurado que ten a laboura de sopesar e elexir. Tamén cremos na nosa capacidade e solvencia como técnicos á hora de desenvolver e levar a cabo un proxecto, a solvencia non é cuestión de cantidade senón de calidade.
Esto non é máis que outra maniobra corporativista para seguir dando xogo aos mesmos, empurrando a marchar á xente nova con ganas de facer as cousas de outra maneira(3).
Nós seguiremos dando guerra; esperando que a veciñanza de Bueu atope unha solución axeitada á súa demanda.

(1) Facebook da plataforma veciñal.
https://www.facebook.com/pages/SALVEMOS-O-ESTALEIRO/
(2) Bueu comeza a salvar un dos últimos estaleiros tradicionais.
http://www.galiciaconfidencial.com/nova/7279.html
(3) Máis de 65.000 emigrantes amortiguan o paro xuvenil en Galicia dende o inicio da crise.
http://www.eldiario.es/galicia/emigrantes-amortiguan-juvenil-Galicia-crisis_0_110939139.html

Obradoiro de achegamento a construcion natural

Hábitat Social, continúa a formación en sistemas de construción natural.
Estamos preparando un obradoiro para finais de verán, e queremos que se adapte o máximo posible ás expectativas que moitas de vós xa nos fixestes chegar. Por iso deixamos aquí un esbozo do que pretendemos facer para que nos deades a vosa opinión sobre os contidos e sobre o calendario proposto.
Pensamos nun obradoiro orientado á autoconstrución, no que en varias fases construiríase a estrutura básica dunha pequena edificación duns 40 metros cadrados, con posibilidade de tocar incluso a execución das instalacións. Seguir lendo